المشاركات

عرض المشاركات من أغسطس, 2010

كفوف

بشيل كفوفك في إيديا. بشيلهم في كفوفي إللي أخدتهم منك. بشيلهم عشان متتعبيش من الحمل – أكياس و شنط و سبيتة غسيل و كتب و أوراق تتصحح. مفيش كفوف تشيل كل ده لوحدها.

يبقولولي إن عشان كده بنتجوز – عشان مفيش كفوف بتشيل كل ده لوحدها – و إنتِ لحد دلوقتي لسه شايلة لوحدك.
بشيل عينيكي في عينيا. بشيلهم في عينيا جواه و أشوف بيهم. عينيا إللي إديتهملي شبه عينيكي. بشيل عينيكي عشان لما بنشوف كتير أوي بنتعب و بنحتاج نقعد في الظلمة و نريّح عينينا من كل إللي شافوه و نبتدي نشوف من جديد.
بشوف بعنيكي و أعرف منهم إن لما نقعّ لازم نقوم منغير ما نتستنى د يقومنا. و لما نتحبس منغير هوا لازم نخلق لنفسنا منفذ و لما حد يغمي عيونا لازم نستعمل كفوفنا عشان نلاقي طريق.
بشيل قلبك في قلبي. بشيل قلبك معايا – على طول – بشيل جوايا حكاياتك و أحلامك و سنينك. بشيل قلبك معايا عشان لما الحزن جواه يتقل أحمله منك و عنك و تخفي و تطيري – ريشة من على كفوف صغيرة بخواتم فضة شبة كفوفك.