غسيل القاهرة


مكانش ينفع أسيب القاهرة عشان الوجع يروح ف رجعت لها تاني. رجعت للست القوية إللي تكسرك و لما تيجي تمشي و تسيبها تحس إنك سايب قلبك معاها ف ترجع لها و لشوارعها و لترابها و لنيلها الميت الأخضر.

لو كنت ههرب من القاهرة كنت هروح على الإسكندرية. هناك كل حاجة إبتدت منغير ما نحس بس أنا مكانش هاين عليا أروح لها مكسورة القلب. عايزة لما أروح أكون لميت شوية بس مش كتير أوي برده عشان بيقولوا ماية البحر ملحها زي الدوا بيطهر الجرح و ينظفه و يلم الجنبين على بعض من تاني - من جديد على أبيض.

ف رجعت للقاهرة

بس لما رجعت بعنيا كنت حاملة عيون واسعين جعانين جوايا و شفت شوارع تانية و ماياه صافية و ذقت كل حاجة من تاني.

شفت مدينة جديدة. طلعت على السطح و شفت إللي كنت عايزة أشوفه معاك و مشفتهوش – الشيشان الخضرا قديمة و جديدة و الحيطان الرمادي و الغسيل إللي كنت عايزة أرقص معاه.

عمري ما رقصت معاك. و لو كنت حاولت ترقص معايا كنت هتكسف أوي منك و مكنتش هرقص.

بس كنت هسيبك ترقص بيا

كنت على أتم الإستعداد إني أخليك ترقص بيا لحد النجوم

يمكن أنا كنت حمل ثقيل – يمكن كنت عايز توصل هناك لوحدك – يمكن كنت محتاج تكون هناك لوحدك – و إتكسفت مني.

يمكن أنا بس إللي كنت عايزة أخطو لحد السما على إيديك

يمكن...

كل يوم بأختار سبب من الأسباب دي و أبوسه و أرويه بكام دمعة من إللي بيضايقوك و بيفكروك بضعفي زي ما بتقول و برميه لفوق – بكل قوتي عشان يوصل لنجمة.

و بستنى الدنيا تشتي و تمطر ماياه مالحة من دموعي إللي وصلت مع كل الأسباب عشان لسه شوية على سفرية إسكندرية.

تعليقات

‏قال ranim
اولا اولا
البوست حلو جدا جدا جدا وعجبني جدا
ثانيا
انا اول مرة ادخل علي البوج بتاعت حضرتك عجبتني اوي وان شاء الله مش هتقي اخر مرة
وعلي فكرة انا حضرت عرض انا الحكاية وحضرتك عجتيني جدااااااااا

تحياتي مبتسمة دائما
‏قال Zainab
رنيم
متشكرة جدا على ذوقك و كلامك الجميل و اللطيف جدا

مبسوطة إنك حضرتي العرض و أرجو إن دي متكونش أخر مرة تدخلي على المدونة و لا أخر مرة تحضري عرض أنا الحكاية

شكرا :)

المشاركات الشائعة من هذه المدونة

Olga's Pool

زرع بصل

Perhaps, Hands