أشياء لا تُشترى



سنة تانية هتخلص و  إنتِ زي ما إنتِ, زي ما بحبِك.

أنا مرقصتش مع حد قد ما رقصت معاكي.  إحنا رقصنا ف كل حتة و مع ناس مختلفة و ناس نعرفها و ناس منعرفهاش. و دايماً كنا بنرقص لحد ما نعيط من الضحك و نروح ننام و نصحى نضحك تاني.

بفتكر مارس إللي قبل إللي فات و بفتكر أول مرة شفتِك فيها. كنتِ بترقصي على "فكروني" في إسكندرية و أنا كنت مبهورة. كانت أخر حاجة متوقعاها إني أشوف سولو رقص شرقي على واحدة من أكتر الأغاني إللي بحبها.

بعدها ع القهوة كنتِ بتاكلي سندوتشات كبده و أنا قمت و أكلت سندوتشين زيك بالضبط.

شيء جميل إن الواحدة يكون ف حياتها واحدة زيك تقلدها.

بفتكر لما كنت أنا إللي بعلمك الرقص و بعمل خطواتي الفظيعة و كنتِ إنتِ بترقصي ورايا كأني عارفة أنا بعمل إيه. و فاكرة في حنة ليلى؟ أنا إتخضيت بجد. حسيت إني بشوفك تاني لأول مرة و بعرفِك من جديد و إحنا واقفين كلنا شوية ببدل رقص و شوية منغير و إنتِ كنتِ أجمل حاجة أنا شفتها ف حياتي
بردو يومها كنتِ لابسة فستان بمبة زي إللي كنتِ لابساه ف إسكندرية,

إحنا بقالنا سنتين بنقول نفس الكلام على كراسي مختلفة بس إحنا مش زي ما إحنا.

أنا عارفة إن أنا كبرت بيكي و معاكي و شفتِك بتكبري بالرغم من كل شيء و شفتِك برده بتصغري ف لحظات و ترجعي شبه البنت الصغنونة إللي لا أن و لا إنتِ بنعرف نرد عليها.

طوال السنتين دول إنتِ كنتِ معايا و أنا بخرج من حكايات و أدخل في حكايات عشان أطلع منها أقوى و متلخبطة و بردو إنتِ جنبي على طول.  

و المصيبة إن بعد ده كله لما بتكوني متضايقة أو مش كويسة أنا مش بعرف أعمل إيه. بت مفعوصة زيّ هتعمل إيه عشان تخرجك من أي حاجة مغيمة يومك؟

هنرقص

هألف كوريوجرافي جديدة و هنرقص و نضحك و نعيط و نصحى نضحك تاني.

هنرقص بطريقة عبيطة زي ما أنا بعمل على طول  و  ف ثانية أنا هبطل رقص عشان إنتِ بترقصي بجد  من قلبِك و هتفرج على كل حركة من وسطتك و هي بتنطر كل حاجة مزعلاكي و مخلية ضحكتك ضيقة.

هنرقص عشان ده إللي بقالنا  سنتين بنعملوا. وسط إللي ماتوا و إللي عاشوا من جديد و إللي ضربوا و إللي رقصوا و إللي عرضوا و  إللي حبوا و  إللي إتحبوا إحنا كنا بنرقص.

ف السنتين إللي فاتوا الحاجتين إللي متغيروش كانوا أنا و إنتِ.





تعليقات

إرسال تعليق

المشاركات الشائعة من هذه المدونة

زيت على كانافا

محمد بعد مرور شهور علي فراقهم ، لا تزال عيناها تسيطر على أفكاره. كل شيء في حياته يستحضرها. يشعر كأن روحها تسكنه. يكاد ينطق باسمها كل مرة تفترق شفتاه ليتكلم مع أحد. عندما يجلس وحده في الليل يحاول أن يرسم، أن يخرج طاقته في شيء إيجابي. لكن كل ما يخرج من طرف قطعة الفحم هو اسمها. يكتب اسمها بخط الرقعة مرة وبالنسخ مرة أخرى، ثم يرسم وردًا أو مفتاح حياة صغير ليزخرف اسمها. يسأل نفسه لماذا تركها تذهب. يرقد في سرير غير مريح مفتقدًا جزءً من نفسه أخذته معها. لا يرسم لوحة واحدة إلا بعدما يراها. يلمحها وهي تقود سيارتها في المنيل. ذلك اليوم يعود إلى الأتيليه ويمسح تراب شهور من على أنابيب الألوان والباليتة. يرسم خطوط بلا ملامح على "الكانافا" بقلم فحم ناعم. يملأ اللوحة بألوان ساخنة. تمر الساعات ومع مرورها تظهر تقاسيم وجه وجسد امرأة تميل حتى لا يظهر إلا كتفها الأيمن وجزء من ظهرها الذي تساقط عليه خصلات من شعرها البني المعقوف عند أسفل عنقها. رسم وجهها الخمري من شريط ذكريات هاجمه بشراسة فظهر أنف به عوجة صغيرة وشفاه ممتلئة. عندما ينتهي من وضع آخر لمسات على اللوحة يأخذ خطوتين إلى الخلف
قراءة المزيد

صورة يوسف

صورة
صورة يوسف شجر المانجة مبيطرحش ممكن أعمل أي حاجة عشان أرجع تاني لنص أغسطس وأكل مانجة معاك بعد الغدا، دلوقتي، موسم العويس خلص وعدى، وشجر المانجة مبيطرحش. من ورا السلك، من شباك المطبخ، ورق شجرة المانجة باين بالرغم من التراب ومن صغر الشباك. مع إني مش دايمًا بفتكرك عند الحوض، حاسة بضلك هناك، حركة ايديك، تنهيدة من بتوعك، كلام عن المية اللي بتغلي ف مينفعش دلوقتي أعملك نسكافية. معرفش لو كل الحاجات دي حصلت في يوم ما بنفس الترتيب اللي أنا فاكراه دلوقتي، يمكن ده اللي الذاكرة بتعمله في الوقت اللي زي ده، وقت ما مبيبقلناش غير الذاكرة نعتمد عليه عشان نحاول نوصل لك. أخر مرة وقفت عند الحوض كنت بغسل كبايات جديدة، شربوا فيها اللي جايين يعزوا، وهما أصلًا مش عارفين يعني ايه إن ضلك خلاص ميكونش عند الحوض اللي بينزل فيه تفل الشاي، محدش فيهم يعرف الشاي معاك، محدش فيهم مشي في نور ضلك. كنت دايمًا بفكر إنك راجل بتاخد مساحة كبيرة من الفضاء، عشان إنت كده، حد كبير، راجل بياخد مكان عشان كل حاجة بتتعمل زي ما إنت عايزها، وعشان يكون في مكان لحكاياتك ولحاجاتك، وعشان الهيبة والضحكة والحنية دول كا
قراءة المزيد

The Madness of Mrs. Woolf

There are voices in our heads, telling us what to do, and where to go and what to wear. There is a little Zainab inside of me whom I come to when I am hurting and when I know I have left her defenseless and bare. The voices quarrel and the most bitter wins. What has brought me here and how does one get out? In the middle of the voices is the voice that pushes to dream of space. Openness. White-washed walls which I have chosen. A bed I will make. Or not. A bed. A space of a bed. A window. And curtains. And yet I cannot go beyond past the first few pages of her book. Mrs. Woolf. Who wanted a room of her own. Perhaps I take this lack of a room as an excuse to bury myself behind all that might seem so vital which has come to feel so loose, like trying to catch the grain – it isn't even a grain – of dust that bothered your eye. And yet I yearn to catch it. To follow it. To hide my smallness behind it and to make it bigger and bigger so that it can cover me who
قراءة المزيد